حزن الخشب - على سلامة

الخشب بطبيعته دافى
لكن غربة النسمة الجميلة
... أجبرتنى ع المكيف
ما بقيتش عارف امتى اشتّى
ولا امتى أصيّف..

أوضة النوم القديمة
كلها خشب ف خشب..
ورغم كده.. باردة جدا..!
ما عرفش ليه..؟

رميت دماغى ع المخدة م التعب..
نسى قلبى كل اللى له
وافتكر بس اللى عليه..
شوية.. وابتديت أسمع أصوات غريبة
وأنا من دبت النملة بقلق..
وف عقل بالى أقول مصيبة
لو كان هجوم من بلطجية
وانا لا عندى بندقية
ولا تحت بيتى خندق..

وابتدى الجهل اللى فيا..
يقنعنى انه الأوضة مسكونة بالعفاريت
والغريبة انى ابتديت أصدق..
لولا ستر ربنا..
شوية العلم البسيط اللى لسة عندى
فكرونى.. اصحى يا ابومخ طوبة..
ده من فرق درجات الحرارة والرطوبة..
ابتدى الخشب يطقطق..
رميت المكيّف.. على أمل النسمة ترجع
واحكى لها عن حزن الخشب
يمكن تصدق..

http://www.almasryalyoum.com/node/517633